Hargeysa- Maareyaha Hay'adda Duulista Madaniga ah ee Somaliland, Cabdi Maxamed Rodol, ayaa sheegay in Somalia ay hawada la wareegayso "iyada oo aan laga wada tashan lagana heshin."

Dawladda Somalia ayaa sheegtay in maanta lagu wareejinayo maamulka hawada oo markii ay burburtay dawladdii Maxamed Siyaad Barre ay la wareegtay Qaramada Midoobay.

Maareeyuhu wuxuu sheegay in talaabada ay dawladda Somalia qaaday ay ku tahay xad gudub heshiiskii Istanbul ee ay wada galeen Somaliland iyo Somalia.

Wuxuu sheegay inay keeni karto "khalkhal iyo jaah wareer.”

Isaga oo ka hadlay shir jaraa’id oo uu ku qabtay Hargeysa, wuxuu ku hanjabay in wixii ka dhasha ay masuuliyadeeda qaadi doonto xukuumadda Somalia.

Ugu danbayntii wuxuu sheegay inaan Somaliland "marna ogolaan doonin in hawadeeda meel kale laga maamulo.’